ТАВ АЕРОДРОМИ: Подготвуваме мастер-план за развој на скопскиот и охридскиот аеродром

ТАВ Аеродроми, меѓународната групација со седиште во Истанбул, најави дека подготвува мастер-план за развој на двата македонски аеродроми.

Мастер-планот, кој интензивно се подготвува со поддршка од мнозинскиот сопственик на ТАВ Аеродроми, француски АДП, се очекува да биде готов во следните два месеци и до крајот на годинава, концесионерот ТАВ Македонија, како подружница на ТАВ Аеродроми, ќе ѝ го презентира планот на македонската влада.

Серкан Каптан, главен извршен директор на ТАВ Аеродроми, членка на АДП, изјави: “Како ТАВ Аеродроми, реномиран бренд во аеродромските операции, на македонскиот пазар почнавме да работиме во 2010 година. Оттогаш досега, за неполни 15 години, со поддршка од Владата и од сите надлежни владини институции, успеавме да го развиеме авиосообраќајот во земјата, со цел да овозможиме патувањето со авион да биде достапно на што поголем број луѓе. На пазарот донесовме нови и клучни авиокомпании, отворивме преку 40 нови дестинации, а бројот на патници го зголемивме за речиси пет пати – од околу 640.000 патници на двата аеродрома во 2009 - на 3,1 милион патници во 2023 година. Ковид-кризата силно нè погоди, но од втората половина на 2022 година бројот на опслужени патници и летови почна да се зголемува. И покрај сите препреки, ние не престанавме да работиме со ентузијазам и упорност со цел континуиран раст и развој на македонските аеродроми, а оттука и на македонската економија, како и на зајакнување на врските меѓу Турција и нашата пријателска Македонија”, изјави Серкан Каптан, Главен извршен директор на групацијата ТАВ Аеродроми, членка на АДП. 

Неџат Курт, генералниот директор на ТАВ Македонија, изјави: “Токму во насока на раст и развој на двата македонски аеродрома е мастер-планот кој во моментов го подготвуваме со помош на нашиот мнозински сопственик АДП. Целта е дополнително да ја развиеме авиоиндустријата во Македонија. Анализите ќе покажат што сè е потребно да се направи на Меѓународниот Аеродром Скопје и Аеродромот Свети Апостол Павле Охрид, а потоа истиот ќе ѝ го презентираме на Владата. Нашата цел е да ги направиме скопскиот и охридскиот аеродром регионални авијациски центри, конкуретни на останатите аеродроми во регионот.” Oсвен во капитални инвестиции и развој на мрежата на нови авиокомпании и авиолинии од скопскиот и од охридскиот аеродром, ТАВ Аеродроми ќе продолжи да го вложува своето групациско знаење и ресурси и во обезбедување на високвалитетни и конкурентни услуги на двата македонски аеродрома.

“Следејќи ги трите столба на корпоративното управување на нашата групација ТАВ Аеродроми, а тие се - гостопримство, дигитализација и одржливост, ќе продолжиме со интеграција на сите видови авијациски и неавијациски услуги во рамки на нашето управување со аеродромите, со цел да креираме иновативни аеродроми кои постојано ќе ги евалуираат барањата на патниците и ќе креираат клиентско искуство скроено по нивна мерка”, објаснува Каптан.     
Според генералниот директор на ТАВ Македонија, Неџат Курт, доказ за досегашните  заложби за обезбедување висок квалитет на аеродромските услуги се Airport Service Quality (ASQ) наградите добиени од ACI, кои од 2012 година досега Меѓународниот Аеродром Скопје ги доби девет пати, во категоријата - најдобар аеродром од 2 до 5 милиони патници годишно во регионот на Европа. 

“Последната ASQ-награда е за 2023 година. Ќе продолжиме да учествуваме во овие реномирани светски програми од нашата индустрија за истражување на мислењето на клиентите, бидејќи како услужна дејност задоволството на клиентите е една од нашите главни цели.”, изјави Курт.
ТАВ Аеродроми  од 2010 година досега во двата македонски аеродроми има инвестирано над 300 милиони евра и на скопскиот и охридскиот аеродром вработува над 1.000 луѓе – во ТАВ Македонија, како аеродромски оператор, како и во сестринските фирми БТА, АТУ, ТАВ Технолоџис и ТАВ МОС. 

Во првите осум месеци годинава ТАВ Аеродроми опслужи 2,1 милион патници (2.128.981) на двата македонски аеродрома, што е 4% зголемување во однос на лани и 17.196 лета што е за 12% повеќе од истиот период во 2023 година.